ባለስልጣኑን ያሳሰበው የምርመራ ጋዜጠኝነትና የፍትሕ አካላት ትዕዛዝ

ከቅርብ ጊዜያት ወዲህ የምርመራ ጋዜጠኝነት ሥራዎች አንዲቆሙ ትዕዛዝ የመስጠት አዝማሚያ እየስተዋለ መምጣቱን የመገናኛ ብዙኃን ባለሥልጣን አስታወቀ።

ከሰሞኑ የፋና ብሮድካስት ካዜጠኞች አንድ የሪል እሰቴት ቅሬታን በተመለከተ ለዘገባ በወጡበት በፖሊስ ለሰዓታት መታሰራቸው ይታወሳል።

የመገናኛ ብዙኃን ባለሥልጣን ለመገናኛ ብዙኃን ሥራ አስቻይ ሁኔታ እንዲፈጠር በሕግ የተጣለበትን ኃላፊነት ከመወጣት አንፃር መገናኛ ብዙኃን በሚያከናውኗቸው የምርመራ ጋዜጠኝነት ሥራዎች ላይ በማንኛውም አካል የሚፈጸም ማዋከብ እንዲቆም ባለስልጣኑ አሳስቧል።

በተለይም የምርመራ ጋዜጠኝነት ሥራ አጋዥ እና ተዋናይ መሆን የሚጠበቅባቸው የፍትሕ አካላት ለዚህ ሥራ አጋዥ እንጂ እክል እንዳይሆኑ ባለሥልጣኑ ጥሪውን አቅርቧል።

የፍትሕ አካላት የምርመራ ጋዜጠኝነት ሥራን ሊያግዙ እንጂ ሊያደናቅፉ እንደማይገባ ነውያባለስልጣኑ ባወጣው መግለጫ ያሳሰበው።

የኢፌዴሪ ሕገ መንግሥት አንቀጽ 29 ንዑስ አንቀጽ 2፤ 3/ለ እና 4 እንዲሁም በመገናኛ ብዙኃን አዋጅ ቁጥር 1238/2013 አንቀጽ 48 መሠረት መገናኛ ብዙኃን የሕዝብን ጥቅም የሚመለከት መረጃ የማግኘት መብት እንዳላቸው መገለጹን ባለሥልጣኑ አስታውሷል።

ለዴሞክራሲያዊ እና ተጠያቂነት ለሰፈነበት ሥርዓት ግንባታ አስፈላጊ የሆኑ መረጃዎችን የማግኘት እና የመመርመር የአሠራር ነጻነት አልፎ ተርፎም የሕግ ጥበቃ እንደሚደረግላቸው መደንገጉንም ጠቅሷል።

የምርመራ ጋዜጠኝነትን ከማበረታታት አንፃርም ከሕጋዊ ማሕቀፎች ባለፈ እንደ መንግሥት አቅጣጫ ተይዞ እንዲሠራ ጠቅላይ ሚኒስትር ዐቢይ አሕመድ በሕዝብ ተወካዮች ምክር ቤት ተገኝተው ማሳሰባቸውንም ነው ያስታወሰው።

ከዚህ በተቃረነ አግባብ የመገናኛ ብዙኃን ባለሞያዎች የምርመራ ጋዜጠኝነት ሥራ ላይ በማንኛውም መንገድ እክል መፍጠር የዜጎች መብትን መደፍጠጥ፤ የዴሞክራሲ ባህል ግንባታ ላይ አሉታዊ ተጽዕኖ መፍጠር እንዲሁም ተጠያቂነት እንዳይሰፍን ከአጥፊዎች ጋር እንደመተባበር እንደሚቆጠር ባለስልጣኑ አስታውቋል።

በመርህ ደረጃ የዜጎች መብት የተረጋገጠበት የዴሞክራሲ ባህል የሚጎለብትበትና ተጠያቂነት የሚሰፍንበት ሥርዓት ለመገንባት የፍትሕ አካላት ከመገናኛ ብዙኃን ጋር ዕጅና ጓንት ሆነው መሥራት እጅግ ጠቃሚ ነው።

 ይህ ሊረጋገጥ የሚችለው ደግሞ መገናኛ ብዙኃን ያለምንም መታወክ እና እንቅፋት ብቁ የምርመራ ጋዜጠኝነት ሥራ መሥራት እንዲችሉ መረጃ የማግኘት፣ የመሰብሰብ፣ የመመርመር እና የማሠራት መብታቸው ከማንም በላይ በፍትሕ አካላት ሲረጋገጥ እና ጥበቃ ሲደረግለት ነው ሲል መገናኛ ብዙሃን ባለስልጣን በመግለጫ አስፍሯል።

netevm.com

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.